ವಿರಾಟ್ ಕೊಹ್ಲಿಗೆ ಸಡ್ಡು ಹೊಡೆದ 15 ವರ್ಷದ ಪೋರ: ವೈಭವ್ ಸೂರ್ಯವಂಶಿ ಬ್ಯಾಟ್ಗೆ 12 ಕೋಟಿ ರೂ. ಬಂಪರ್ ಆಫರ್!
ಐಪಿಎಲ್ 2026 (IPL 2026) ಟೂರ್ನಿಯಲ್ಲಿ ರಾಜಸ್ಥಾನ್ ರಾಯಲ್ಸ್ (Rajasthan Royals) ಪರ ಅಬ್ಬರಿಸುತ್ತಿರುವ 15 ವರ್ಷದ ಯುವ ಆಟಗಾರ ವೈಭವ್ ಸೂರ್ಯವಂಶಿ (Vaibhav Sooryavanshi) ಇದೀಗ ಮೈದಾನದ ಹೊರಗೂ ಹೊಸ ಇತಿಹಾಸ ಸೃಷ್ಟಿಸಿದ್ದಾರೆ. ವರದಿಗಳ ಪ್ರಕಾರ, ಈ ಯುವ ಸ್ಫೋಟಕ ಬ್ಯಾಟ್ಸ್ಮನ್ಗೆ ಬ್ಯಾಟ್ ಸ್ಪಾನ್ಸರ್ಶಿಪ್ಗಾಗಿ (Bat Sponsorship) ವರ್ಷಕ್ಕೆ ಬರೋಬ್ಬರಿ 12 ಕೋಟಿ ರೂಪಾಯಿಗಳ ಆಫರ್ ಒಲಿದುಬಂದಿದೆ.
ಕೊಹ್ಲಿ ದಾಖಲೆ ಸರಿಗಟ್ಟುವತ್ತ ವೈಭವ್
ಟೀಮ್ ಇಂಡಿಯಾ ದಿಗ್ಗಜ ವಿರಾಟ್ ಕೊಹ್ಲಿ (Virat Kohli) ಅವರು ಎಂಆರ್ಎಫ್ (MRF) ಬ್ಯಾಟ್ ಸ್ಪಾನ್ಸರ್ಶಿಪ್ನಿಂದ ವರ್ಷಕ್ಕೆ 12.5 ಕೋಟಿ ರೂ. ಗಳಿಸುತ್ತಿದ್ದಾರೆ. ಇದೀಗ ಕೇವಲ 15 ವರ್ಷದ ವೈಭವ್ ಸೂರ್ಯವಂಶಿಗೆ ಕೂಡ 12 ಕೋಟಿ ರೂ.ಗಳ ಬೃಹತ್ ಮೊತ್ತದ ಆಫರ್ ಬಂದಿರುವುದು ಕ್ರಿಕೆಟ್ ವಲಯದಲ್ಲಿ ಅಚ್ಚರಿ ಮೂಡಿಸಿದೆ.
ಪ್ರಸ್ತುತ ವೈಭವ್ ಅವರು ಎಸ್ಎಸ್ (SS – Sareen Sports) ಕಂಪನಿಯೊಂದಿಗೆ ವರ್ಷಕ್ಕೆ 50 ಲಕ್ಷ ರೂ. ಗಳ ಒಪ್ಪಂದ ಹೊಂದಿದ್ದಾರೆ. ಈ ಹೊಸ 12 ಕೋಟಿ ರೂ.ಗಳ ಒಪ್ಪಂದಕ್ಕೆ ಸಹಿ ಹಾಕಿದರೆ, ಅವರ ಪ್ರಾಯೋಜಕತ್ವದ ಆದಾಯವು ಈಗಿರುವುದಕ್ಕಿಂತ ಬರೋಬ್ಬರಿ 24 ಪಟ್ಟು ಹೆಚ್ಚಾಗಲಿದೆ. ಟೈರ್ ಉತ್ಪಾದಕ ಕಂಪನಿಗಳು ಸೇರಿದಂತೆ ಹಲವು ಪ್ರಮುಖ ಬ್ರ್ಯಾಂಡ್ಗಳು ಈ ಯುವ ತಾರೆಯನ್ನು ತಮ್ಮತ್ತ ಸೆಳೆಯಲು ಮುಗಿಬಿದ್ದಿವೆ.
ಐಪಿಎಲ್ 2026ರಲ್ಲಿ ಸೂರ್ಯವಂಶಿ ಅಬ್ಬರ
ಈ ಬಾರಿಯ ಐಪಿಎಲ್ನಲ್ಲಿ ಅಕ್ಷರಶಃ ರನ್ ಸುನಾಮಿ ಸೃಷ್ಟಿಸಿರುವ ವೈಭವ್, 240ಕ್ಕೂ ಹೆಚ್ಚಿನ ಸ್ಟ್ರೈಕ್ ರೇಟ್ನಲ್ಲಿ ಬ್ಯಾಟ್ ಬೀಸಿ 680ಕ್ಕೂ ಹೆಚ್ಚು ರನ್ ಕಲೆಹಾಕಿ ಆರೆಂಜ್ ಕ್ಯಾಪ್ ರೇಸ್ನಲ್ಲಿದ್ದಾರೆ. ಒಂದೇ ಸೀಸನ್ನಲ್ಲಿ ಅತಿ ಹೆಚ್ಚು ಸಿಕ್ಸರ್ (60+) ಸಿಡಿಸಿದ ಕ್ರಿಸ್ ಗೇಲ್ ಅವರ 2012ರ ದಾಖಲೆಯನ್ನೂ ಇವರು ಧೂಳಿಪಟ ಮಾಡಿದ್ದಾರೆ. ಕೇವಲ 266 ಎಸೆತಗಳಲ್ಲಿ 60 ಸಿಕ್ಸರ್ ಬಾರಿಸಿರುವ ಇವರ ಅತಿಮಾನುಷ ಪ್ರದರ್ಶನವೇ ಕಾರ್ಪೊರೇಟ್ ಕಂಪನಿಗಳು ಬ್ಲಾಂಕ್ ಚೆಕ್ (Blank Cheque) ಹಿಡಿದು ಈ ಯುವಕನ ಬೆನ್ನೇರಿ ಬರಲು ಮುಖ್ಯ ಕಾರಣವಾಗಿದೆ.
