ರೊನಾಲ್ಡೊ ಐತಿಹಾಸಿಕ ಮೈಲಿಗಲ್ಲು: ಆರೂ ವಿಶ್ವಕಪ್ಗಳಲ್ಲೂ ಗೋಲು ಬಾರಿಸಿದ ರೊನಾಲ್ಡೊ!
ಫಿಫಾ ವಿಶ್ವಕಪ್ 2026ರ ಗ್ರೂಪ್ ‘ಕೆ’ ಪಂದ್ಯದಲ್ಲಿ ಉಜ್ಬೇಕಿಸ್ತಾನ್ ವಿರುದ್ಧ ಪೋರ್ಚುಗಲ್ ತಂಡವು 5-0 ಗೋಲುಗಳ ಭರ್ಜರಿ ಜಯ ಸಾಧಿಸಿದೆ. ಈ ಪಂದ್ಯದಲ್ಲಿ ತಂಡದ ನಾಯಕ ಕ್ರಿಸ್ಟಿಯಾನೋ ರೊನಾಲ್ಡೊ ಎರಡು ಅದ್ಭುತ ಗೋಲುಗಳನ್ನು ಗಳಿಸುವ ಮೂಲಕ ಫುಟ್ಬಾಲ್ ಇತಿಹಾಸದಲ್ಲಿ ಸುವರ್ಣ ಅಕ್ಷರಗಳಲ್ಲಿ ಹೊಸ ದಾಖಲೆ ಬರೆದಿದ್ದಾರೆ.
ಪಂದ್ಯದ ಆರಂಭದಲ್ಲೇ (6ನೇ ನಿಮಿಷ) ಜಂಟಿ ಪಾಸ್ ನೆರವಿನಿಂದ ಮೊದಲ ಗೋಲು ಬಾರಿಸಿದ ರೊನಾಲ್ಡೊ, ಫುಟ್ಬಾಲ್ ಇತಿಹಾಸದಲ್ಲೇ ಸತತ 6 ಬೇರೆ ಬೇರೆ ಫಿಫಾ ವಿಶ್ವಕಪ್ ಆವೃತ್ತಿಗಳಲ್ಲಿ (2006, 2010, 2014, 2018, 2022, 2026) ಭಾಗವಹಿಸಿ, ಆಡಿದ ಎಲ್ಲಾ ಆವೃತ್ತಿಗಳಲ್ಲೂ ಗೋಲು ಗಳಿಸಿದ ವಿಶ್ವದ ಏಕೈಕ ಪುರುಷ ಆಟಗಾರ ಎಂಬ ಅನನ್ಯ ಮೈಲಿಗಲ್ಲನ್ನು ತಲುಪಿದ್ದಾರೆ. ಲಿಯೋನೆಲ್ ಮೆಸ್ಸಿ ಕೂಡ 6 ವಿಶ್ವಕಪ್ ಆಡಿದ್ದರೂ, 2010ರ ಟೂರ್ನಿಯಲ್ಲಿ ಗೋಲು ಗಳಿಸಲು ವಿಫಲರಾಗಿದ್ದರು. ಆದರೆ ರೊನಾಲ್ಡೊ ಪ್ರತಿ ಆವೃತ್ತಿಯಲ್ಲೂ ಗೋಲು ಬಾರಿಸಿ ಇತಿಹಾಸ ನಿರ್ಮಿಸಿದ್ದಾರೆ.
ಇದರೊಂದಿಗೆ ಪಂದ್ಯದ 39ನೇ ನಿಮಿಷದಲ್ಲಿ ತಮ್ಮ ವೈಯಕ್ತಿಕ ಎರಡನೇ ಗೋಲು ಹೊಡೆದ ರೊನಾಲ್ಡೊ, ವಿಶ್ವಕಪ್ನಲ್ಲಿ ಪೋರ್ಚುಗಲ್ ಪರ ಒಟ್ಟು 10 ಗೋಲುಗಳನ್ನು ಪೂರೈಸಿದರು. ಈ ಮೂಲಕ ಪೋರ್ಚುಗಲ್ನ ದಂತಕಥೆ ಯೂಸೆಬಿಯೊ ಅವರ 9 ಗೋಲುಗಳ ದಾಖಲೆಯನ್ನು ಮೀರಿ, ವಿಶ್ವಕಪ್ ಇತಿಹಾಸದಲ್ಲಿ ಪೋರ್ಚುಗಲ್ ಪರ ಅತಿ ಹೆಚ್ಚು ಗೋಲು ಗಳಿಸಿದ ಆಟಗಾರ ಎನಿಸಿಕೊಂಡಿದ್ದಾರೆ. ಪೋರ್ಚುಗಲ್ ಪರ ಉಳಿದ ಗೋಲುಗಳನ್ನು ನುನೊ ಮೆಂಡಿಸ್ ಮತ್ತು ರಾಫೆಲ್ ಲಿಯಾವೊ ಬಾರಿಸಿದರೆ, ಒಂದು ಗೋಲು ಉಜ್ಬೇಕಿಸ್ತಾನ್ನ ಓನ್ ಗೋಲ್ ಮೂಲಕ ಮೂಡಿಬಂದಿದೆ.
