ಬೆಳ್ತಂಗಡಿ: ಪ್ರಕೃತಿ ಪ್ರೇಮಿಗಳ ಮತ್ತು ಸಾಹಸಿಗಳ ನೆಚ್ಚಿನ ತಾಣವಾದ ಬೆಳ್ತಂಗಡಿ ತಾಲೂಕಿನ ಐತಿಹಾಸಿಕ “ಗಡಾಯಿಕಲ್ಲು” ಶಿಖರವನ್ನು ಏರುವ ಮೂಲಕ, ಜಯನಗರದ “ಜೇನುಗೂಡು ಟ್ರೆಕ್ಕಿಂಗ್ ತಂಡ” ತನ್ನ 5ನೇ ಚಾರಣವನ್ನು ಯಶಸ್ವಿಯಾಗಿ ಪೂರೈಸಿದೆ.
ದಿನಾಂಕ 25.01.2025 ರಂದು ನಡೆದ ಈ ಚಾರಣವು ಅತ್ಯಂತ ರೋಚಕವಾಗಿತ್ತು. ಗಡಾಯಿಕಲ್ಲು ಚಾರಣವು ಭೌಗೋಳಿಕವಾಗಿ ಅತೀ ಕ್ಲಿಷ್ಟಕರ ಹಾಗೂ ಕಡಿದಾದ ಹಾದಿಯನ್ನು ಹೊಂದಿದ್ದರೂ, ತಂಡದ ಸದಸ್ಯರ ಉತ್ಸಾಹ ಮುಗಿಲು ಮುಟ್ಟಿತ್ತು.
ವಯಸ್ಸು ಅಡ್ಡಿಯಾಗದ ಸಾಹಸ:
ಈ ಚಾರಣದ ವಿಶೇಷವೇನೆಂದರೆ, ಇದರಲ್ಲಿ 9 ವರ್ಷದ ಕಿರಿಯ ಬಾಲಕ/ಬಾಲಕಿಯರಿಂದ ಹಿಡಿದು 57 ವರ್ಷದ ಹಿರಿಯರವರೆಗಿನ ಸದಸ್ಯರು ಪಾಲ್ಗೊಂಡಿದ್ದರು. ಮಹಿಳೆಯರು, ಪುರುಷರು ಹಾಗೂ ಮಕ್ಕಳು ಎನ್ನದೆ ಎಲ್ಲರೂ ಒಗ್ಗಟ್ಟಿನಿಂದ ಕಡಿದಾದ ಬೆಟ್ಟವನ್ನು ಏರಿ ಸಾಧನೆಗೈದರು.
ಸಮರ್ಥ ನಿರ್ವಹಣೆ:
ಈ ಸಾಹಸಮಯ ಚಾರಣದ ಸಂಪೂರ್ಣ ನಿರ್ವಹಣೆಯನ್ನು ಬೆಂಗಳೂರಿನ ಹರೀಶ್ ಕೆ. ಮತ್ತು ಸುಳ್ಯದ ಅಬ್ದುಲ್ಲಾ ರಹಿಮಾನ್ ಸುಳ್ಯ ಅವರು ಅಚ್ಚುಕಟ್ಟಾಗಿ ವಹಿಸಿಕೊಂಡಿದ್ದರು. ಇವರ ಮಾರ್ಗದರ್ಶನದಲ್ಲಿ ತಂಡವು ಸುರಕ್ಷಿತವಾಗಿ ಮತ್ತು ಶಿಸ್ತುಬದ್ಧವಾಗಿ ಚಾರಣವನ್ನು ಪೂರ್ಣಗೊಳಿಸಿತು.
ಕ್ರಿಯಾಶೀಲ ತಂಡ:
ಜಯನಗರದ ‘ಜೇನುಗೂಡು’ ಟ್ರೆಕ್ಕಿಂಗ್ ತಂಡವು ಚಾರಣ ಕ್ಷೇತ್ರದಲ್ಲಿ ಈಗಾಗಲೇ ತನ್ನದೇ ಆದ ಛಾಪು ಮೂಡಿಸಿದೆ. ಇದಕ್ಕೂ ಮೊದಲು ತಂಡವು ಕಠಿಣವಾದ ಕುಮಾರ ಪರ್ವತ, ಕೇರಳದ ರಾಣಿಪುರಂ, ಕೊಡಗಿನ ತಡಿಯಂಡಮೋಳ್ ಮತ್ತು ಯಾಣದಂತಹ ಪ್ರಮುಖ ತಾಣಗಳಲ್ಲಿ ಟ್ರೆಕ್ಕಿಂಗ್ ನಡೆಸಿ ಸೈ ಎನಿಸಿಕೊಂಡಿದೆ. ಇದೀಗ ಗಡಾಯಿಕಲ್ಲು ಏರುವ ಮೂಲಕ ತಂಡವು ತನ್ನ 5ನೇ ಮೈಲಿಗಲ್ಲನ್ನು ಸ್ಥಾಪಿಸಿದೆ.