ಸುಳ್ಯ: ಇಲ್ಲಿನ ಪ್ರತಿಷ್ಠಿತ ನೆಹರೂ ಮೆಮೋರಿಯಲ್ ಕಾಲೇಜಿನ ಸುವರ್ಣ ಸಂಭ್ರಮದ (1976-2026) ಪ್ರಯುಕ್ತ, ದಿನಾಂಕ 25-02-2026 ರ ಬುಧವಾರದಂದು ವಿಶೇಷವಾದ ಒಂದು ದಿನದ ವಿಚಾರ ಗೋಷ್ಠಿಯನ್ನು ಹಮ್ಮಿಕೊಳ್ಳಲಾಗಿದೆ. ಬೆಳಿಗ್ಗೆ 9:30ಕ್ಕೆ ನೆಹರೂ ಮೆಮೋರಿಯಲ್ ಕಾಲೇಜಿನ ಸಭಾಭವನದಲ್ಲಿ (ಕುರುಂಜಿಬಾಗ್) ‘ಗಡಿನಾಡು ಸುಳ್ಯ ಪರಿಸರದ ಭಾಷಾ ಪರಂಪರೆ’ ಎಂಬ ವಿಷಯದ ಮೇಲೆ ಈ ಕಾರ್ಯಕ್ರಮ ನಡೆಯಲಿದೆ. ಬೆಂಗಳೂರಿನ ಕನ್ನಡ ಅಭಿವೃದ್ಧಿ ಪ್ರಾಧಿಕಾರ ಹಾಗೂ ನೆಹರೂ ಮೆಮೋರಿಯಲ್ ಕಾಲೇಜಿನ ಹಿರಿಯ ವಿದ್ಯಾರ್ಥಿ ಸಂಘದ ಜಂಟಿ ಆಶ್ರಯದಲ್ಲಿ ಈ ಕಾರ್ಯಕ್ರಮವನ್ನು ಆಯೋಜಿಸಲಾಗಿದೆ.
ಉದ್ಘಾಟನೆ ಮತ್ತು ಅತಿಥಿಗಳು
ಕಾರ್ಯಕ್ರಮದ ಉದ್ಘಾಟನೆಯನ್ನು ಅಕಾಡೆಮಿ ಆಫ್ ಲಿಬರಲ್ ಎಜ್ಯುಕೇಶನ್ ನ ಅಧ್ಯಕ್ಷರಾದ ಡಾ. ಕೆ. ವಿ. ಚಿದಾನಂದ ಅವರು ನೆರವೇರಿಸಲಿದ್ದಾರೆ. ಕನ್ನಡ ಅಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷರಾದ ಡಾ. ಪುರುಷೋತ್ತಮ ಬಿಳಿಮಲೆ ಅವರು ಆಶಯ ನುಡಿಗಳನ್ನಾಡಲಿದ್ದು, ಪ್ರಾಧಿಕಾರದ ಕಾರ್ಯದರ್ಶಿಯಾದ ಡಾ. ಸಂತೋಷ ಹಾನಗಲ್ಲ ಹಾಗೂ ಸದಸ್ಯರಾದ ಶ್ರೀ ಯಾಕೂಬ್ ಖಾದರ್ ಗುಲ್ವಾಡಿ ಅವರು ಮುಖ್ಯ ಅತಿಥಿಗಳಾಗಿ ಭಾಗವಹಿಸಲಿದ್ದಾರೆ. ಹಿರಿಯ ವಿದ್ಯಾರ್ಥಿ ಸಂಘದ ಅಧ್ಯಕ್ಷರಾದ ಶ್ರೀ ವಿಶ್ವನಾಥ ಕೆ. ಟಿ. ಅವರು ಸಮಾರಂಭದ ಅಧ್ಯಕ್ಷತೆ ವಹಿಸಲಿದ್ದಾರೆ.
ವೈವಿಧ್ಯಮಯ ಭಾಷಾ ಗೋಷ್ಠಿಗಳು
ಈ ವಿಚಾರ ಗೋಷ್ಠಿಯಲ್ಲಿ ಸುಳ್ಯ ಪರಿಸರದ ವಿವಿಧ ಭಾಷೆಗಳ ಕುರಿತು ಗೋಷ್ಠಿಗಳು ಜರುಗಲಿವೆ:
- ಅರೆ ಭಾಷೆ: ಶ್ರೀಮತಿ ಸ್ಮಿತಾ ಅಮೃತರಾಜ್ (ಕವಯತ್ರಿ ಮತ್ತು ಬರಹಗಾರರು, ಚೆಂಬು).
- ತುಳು: ಡಾ. ಪೂವಪ್ಪ ಕಣಿಯೂರು (ವಿಶ್ರಾಂತ ಪ್ರಾಂಶುಪಾಲರು ಮತ್ತು ಬರಹಗಾರರು, ಸುಳ್ಯ).
- ಕೊರಗ: ಶ್ರೀ ರಮೇಶ್ ಮಂಚಕಲ್ಲು (ಅಧ್ಯಕ್ಷರು, ಕೊರಳ್ ಕಲಾ ತಂಡ, ಮಂಗಳೂರು).
- ಹವ್ಯಕ: ಶ್ರೀಮತಿ ಸಹನಾ ಕಾಂತಬೈಲು (ಕೃಷಿಕ ಮಹಿಳೆ ಮತ್ತು ಬರಹಗಾರ್ತಿ, ಕೊಡಗು).
- ಮಲೆಯಾಳಿ: ಡಾ. ಸುಂದರ ಕೇನಾಜೆ (ಅಧ್ಯಾಪಕರು ಮತ್ತು ಬರಹಗಾರರು, ಸುಳ್ಯ).
- ಬ್ಯಾರಿ ಭಾಷೆ: ಶ್ರೀ ಇಸ್ಮತ್ ಪಜೀರ್ (ಬರಹಗಾರರು, ಮಂಗಳೂರು).
- ಕೊಂಕಣಿ: ಡಾ. ಎನ್. ಪ್ರಭು (ಪಶು ವೈದ್ಯಾಧಿಕಾರಿ, ಸುಳ್ಯ).
- ತಮಿಳು: ಡಾ. ಸೆಲ್ವರತ್ನಂ ಕಂದಡ್ಕ (ಬರಹಗಾರರು, ಬೆಂಗಳೂರು).
ಸಮಾರೋಪ ಸಮಾರಂಭ
ಮಧ್ಯಾಹ್ನ 2:30ಕ್ಕೆ ಸಮಾರೋಪ ಸಮಾರಂಭ ನಡೆಯಲಿದೆ. ನೆಹರೂ ಮೆಮೋರಿಯಲ್ ಕಾಲೇಜಿನ ಪ್ರಾಂಶುಪಾಲರಾದ ಡಾ. ರುದ್ರಕುಮಾರ್ ಎಂ. ಎಂ. ಅವರು ಇದರ ಅಧ್ಯಕ್ಷತೆ ವಹಿಸಲಿದ್ದಾರೆ. ಹಿರಿಯ ವಿಮರ್ಶಕರಾದ ಶ್ರೀ ಎಸ್. ಆರ್. ವಿಜಯಶಂಕರ ಅವರು ಸಮಾರೋಪ ನುಡಿಗಳನ್ನಾಡಲಿದ್ದಾರೆ. ಸಮಾರೋಪದ ಮುಖ್ಯ ಅತಿಥಿಗಳಾಗಿ ಕರ್ನಾಟಕ ಅರೆಭಾಷೆ ಸಂಸ್ಕೃತಿ ಮತ್ತು ಸಾಹಿತ್ಯ ಅಕಾಡೆಮಿಯ ಅಧ್ಯಕ್ಷರಾದ ಶ್ರೀ ಸದಾನಂದ ಮಾವಜಿ, ಅಕಾಡೆಮಿ ಆಫ್ ಲಿಬರಲ್ ಎಜ್ಯುಕೇಶನ್ ನ ಪ್ರಧಾನ ಕಾರ್ಯದರ್ಶಿ ಆರ್ಕಿಟೆಕ್ಟ್ ಅಕ್ಷಯ್ ಕೆ. ಸಿ., ಹಾಗೂ ಎನ್.ಎಂ.ಸಿ ಆಡಳಿತಾಧಿಕಾರಿ ಶ್ರೀ ಚಂದ್ರಶೇಖರ ಪೇರಾಲ್ ಅವರು ಉಪಸ್ಥಿತರಿರುತ್ತಾರೆ.
