ಸುಳ್ಯ: ನಗರ ಹಾಗೂ ಸುತ್ತಮುತ್ತಲಿನ ಪೆಟ್ರೋಲ್ ಬಂಕ್ಗಳಲ್ಲಿ ಗ್ರಾಹಕರಿಗೆ ಬಾಟಲಿಯಲ್ಲಿ ಪೆಟ್ರೋಲ್ ಮತ್ತು ಡೀಸೆಲ್ ನೀಡಲು ನಿರಾಕರಿಸುತ್ತಿರುವುದರಿಂದ ದ್ವಿಚಕ್ರ ವಾಹನ ಸವಾರರು ಹಾಗೂ ಸಾರ್ವಜನಿಕರು ತೀವ್ರ ಸಂಕಷ್ಟ ಎದುರಿಸುವಂತಾಗಿದೆ.
ಪೆಟ್ರೋಲ್ ಖಾಲಿಯಾಗಿ ಮಾರ್ಗಮಧ್ಯೆ ವಾಹನ ನಿಂತರೆ, ಸವಾರರು ಪೆಟ್ರೋಲ್ ತರಲು ಬಾಟಲಿ ಹಿಡಿದು ಬಂಕ್ಗೆ ಹೋದರೆ ಸಿಬ್ಬಂದಿ ಇಂಧನ ನೀಡುತ್ತಿಲ್ಲ. ಇದರಿಂದಾಗಿ ಕಿಲೋಮೀಟರ್ಗಟ್ಟಲೆ ಬೈಕ್ ತಳ್ಳಿಕೊಂಡು ಬಂಕ್ಗೆ ಬರಬೇಕಾದ ಅನಿವಾರ್ಯತೆ ಸವಾರರದ್ದಾಗಿದೆ. ವಿಶೇಷವಾಗಿ ಮಹಿಳೆಯರು, ವೃದ್ಧರು ಮತ್ತು ತುರ್ತು ಕೆಲಸದ ಮೇಲೆ ಹೋಗುವವರು ಇದರಿಂದ ಹೈರಾಣಾಗುತ್ತಿದ್ದಾರೆ.
ರೈತರು ಹಾಗೂ ಕಾರ್ಮಿಕರಿಗೂ ಸಮಸ್ಯೆ:
ಕೇವಲ ಬೈಕ್ ಸವಾರರು ಮಾತ್ರವಲ್ಲದೆ, ಕೃಷಿ ಯಂತ್ರೋಪಕರಣಗಳಿಗೆ (ಉದಾಹರಣೆಗೆ: ಮರ ಕೊಯ್ಯುವ ಯಂತ್ರ, ಹುಲ್ಲು ಕತ್ತರಿಸುವ ಯಂತ್ರ) ಹಾಗೂ ಅಂಗಡಿಗಳ ಜನರೇಟರ್ಗಳಿಗೆ ಸ್ವಲ್ಪ ಪ್ರಮಾಣದಲ್ಲಿ ಇಂಧನ ಬೇಕಾಗುವ ರೈತರು ಮತ್ತು ಕಾರ್ಮಿಕರಿಗೂ ಈ ನಿಯಮದಿಂದ ದೊಡ್ಡ ಪೆಟ್ಟು ಬಿದ್ದಿದೆ. ಯಂತ್ರಗಳನ್ನು ಬಂಕ್ವರೆಗೆ ತರುವುದು ಅಸಾಧ್ಯವಾಗಿರುವುದರಿಂದ ದೈನಂದಿನ ಕೆಲಸಗಳಿಗೆ ಅಡ್ಡಿಯಾಗುತ್ತಿದೆ.
ಬಂಕ್ ಮಾಲೀಕರ ಅಸಹಾಯಕತೆ:
ಭದ್ರತಾ ದೃಷ್ಟಿಯಿಂದ ಹಾಗೂ ಇಂಧನವನ್ನು ದುರ್ಬಳಕೆ ಮಾಡಿಕೊಂಡು ಯಾವುದೇ ಅಹಿತಕರ ಘಟನೆಗಳು, ಬೆಂಕಿ ಅವಘಡಗಳು ನಡೆಯಬಾರದು ಎಂಬ ಕಾರಣಕ್ಕೆ ಆಡಳಿತ ಇಲಾಖೆಯ ಕಟ್ಟುನಿಟ್ಟಿನ ಸೂಚನೆ ಇದೆ. ಹಾಗಾಗಿ ತಾವು ಪ್ಲಾಸ್ಟಿಕ್ ಬಾಟಲಿಯಲ್ಲಿ ಇಂಧನ ನೀಡುತ್ತಿಲ್ಲ ಎಂದು ಪೆಟ್ರೋಲ್ ಬಂಕ್ ಮಾಲೀಕರು ಮತ್ತು ಸಿಬ್ಬಂದಿ ತಮ್ಮ ಅಸಹಾಯಕತೆ ವ್ಯಕ್ತಪಡಿಸಿದ್ದಾರೆ.
ಸಾರ್ವಜನಿಕರ ಆಗ್ರಹ:
“ಸುರಕ್ಷತಾ ನಿಯಮಗಳು ಇರಬೇಕು ಎಂಬುದು ಒಪ್ಪುವಂತಹದ್ದೇ. ಆದರೆ ರಸ್ತೆಯಲ್ಲಿ ಅನಿರೀಕ್ಷಿತವಾಗಿ ಪೆಟ್ರೋಲ್ ಖಾಲಿಯಾದಾಗ ಸವಾರರು ಏನು ಮಾಡಬೇಕು? ತುರ್ತು ಸಂದರ್ಭಗಳಲ್ಲಿ ಸೂಕ್ತ ಗುರುತಿನ ಚೀಟಿ (ID Card) ಅಥವಾ ವಾಹನದ ದಾಖಲೆ ಪರಿಶೀಲಿಸಿಯಾದರೂ ಬಾಟಲಿಯಲ್ಲಿ ಅಥವಾ ಸುರಕ್ಷಿತ ಕ್ಯಾನ್ಗಳಲ್ಲಿ ಇಂಧನ ನೀಡಲು ಅವಕಾಶ ಮಾಡಿಕೊಡಬೇಕು” ಎಂದು ಸಾರ್ವಜನಿಕರು ಹಾಗೂ ವಾಹನ ಸವಾರರು ಸಂಬಂಧಪಟ್ಟ ಅಧಿಕಾರಿಗಳನ್ನು ಒತ್ತಾಯಿಸಿದ್ದಾರೆ.
