ಸುಳ್ಯ: 2019ರಲ್ಲಿ ಪ್ರಾರಂಭವಾದ ಇಫ್ತಾರ್ ವಿತರಣಾ ಕಾರ್ಯಕ್ರಮವು, ಕಷ್ಟಕಾಲದಲ್ಲಿ ಯಾರೂ ಹಸಿವಿನಿಂದ ಇರಬಾರದು ಎಂಬ ಸರಳ ಮತ್ತು ಪ್ರಬಲ ಉದ್ದೇಶದಿಂದ ರೂಪುಗೊಂಡಿತು. ಕೋವಿಡ್-19 ಸಾಂಕ್ರಾಮಿಕದ ಸಮಯದಲ್ಲಿ, ಆಹಾರದ ಕೊರತೆ ಎದುರಿಸುತ್ತಿದ್ದ ಆಸ್ಪತ್ರೆಯ ರೋಗಿಗಳು ಮತ್ತು ಅವರ ಜೊತೆಗಾರರಿಗೆ ಈ ಕಾರ್ಯಕ್ರಮವು ನೆರವು ನೀಡಿತು. ಅದೇ ಸಮಯದಲ್ಲಿ, ಲಾಕ್ಡೌನ್ ನಿರ್ಬಂಧಗಳು ಮತ್ತು ಆರ್ಥಿಕ ಸವಾಲುಗಳಿಂದಾಗಿ ಊಟಕ್ಕೆ ಪರದಾಡುತ್ತಿದ್ದ ಪಿಜಿ ವಿದ್ಯಾರ್ಥಿಗಳಿಗೂ ಈ ಉಪಕ್ರಮವು ಸಹಾಯ ಮಾಡಿತು. ಕಳೆದ ಏಳು ವರ್ಷಗಳಿಂದ ಈ ಕಾರ್ಯಕ್ರಮವನ್ನು ಸಮರ್ಪಣಾ ಭಾವದಿಂದ ನಿರಂತರವಾಗಿ ನಡೆಸಿಕೊಂಡು ಬರಲಾಗುತ್ತಿದೆ.
ಈ ವರ್ಷದ ಇಫ್ತಾರ್ ವಿತರಣಾ ಕಾರ್ಯಕ್ರಮದಲ್ಲಿ ಅಗತ್ಯವಿರುವ ಸುಮಾರು 200 ಜನರಿಗೆ ಇಫ್ತಾರ್ ಕಿಟ್ಗಳನ್ನು ವಿತರಿಸುವ ಗುರಿ ಹೊಂದಲಾಗಿದ್ದು, ಇದಾಗಲೇ 200ಕ್ಕೂ ಹೆಚ್ಚು ಜನರಿಗೆ ಇಫ್ತಾರ್’ಗೆ ಅಗತ್ಯವಿರುವ ಖರ್ಜೂರ ಮತ್ತು ಲಘು ಉಪಹಾರದ ಜೊತೆಗೆ, ದೀರ್ಘಾವಧಿಯ ಉಪವಾಸದ ನಂತರ ಶಕ್ತಿ ನೀಡಲು ರಾತ್ರಿಯ ಸಂಪೂರ್ಣ ಊಟದ ಬಾಕ್ಸ್ ಅನ್ನು ಈ ಕಿಟ್ ನೀಡಲಾಗುತ್ತಿದೆ. ಆಸ್ಪತ್ರೆಯ ರೋಗಿಗಳು, ಅವರ ಆರೈಕೆದಾರರು ಮತ್ತು ಮನೆಯಿಂದ ದೂರವಿರುವ ಪಿಜಿ ವಿದ್ಯಾರ್ಥಿಗಳಿಗೆ ಊಟದ ವ್ಯವಸ್ಥೆ ಮಾಡುವ ಚಿಂತೆಯನ್ನು ದೂರ ಮಾಡಿ ನೆರವಾಗುವುದು ಇದರ ಮುಖ್ಯ ಉದ್ದೇಶವಾಗಿದೆ.
ಮಂಗಳೂರು ವಿಶ್ವವಿದ್ಯಾನಿಲಯದ ಸಿಂಡಿಕೇಟ್ ಸದಸ್ಯರಾದ ಸವಾದ್ ಸುಳ್ಯ ಮತ್ತು ಮಂಗಳೂರಿನ ಯೂತ್ ಕೇರ್ ಫೌಂಡೇಶನ್ ಕಾರ್ಯದರ್ಶಿ ಅನ್ಸರುದ್ದೀನ್ ಸಾಲ್ಮರ ಅವರು ಈ ಕಾರ್ಯಕ್ರಮದ ಮುಂಚೂಣಿಯಲ್ಲಿದ್ದಾರೆ. ಈ ಸತ್ಕಾರ್ಯದ ಬಗ್ಗೆ ಹೆಚ್ಚಿನ ಮಾಹಿತಿಗಾಗಿ 9591972555, 9591972357 ಅಥವಾ 9901779949 ಮೊಬೈಲ್ ಸಂಖ್ಯೆಗಳನ್ನು (ಜಿ-ಪೇ / ಫೋನ್-ಪೇ) ಸಂಪರ್ಕಿಸಬಹುದು.
