ಸುಳ್ಯ: “ಕಲಿತ ವಿದ್ಯೆ ಸಮಾಜಕ್ಕೆ ಬೆಳಕಾಗಲಿ, ಗಳಿಸಿದ ಸಂಪತ್ತು ಪರರ ಕಣ್ಣೀರು ಒರೆಸಲಿ” ಎಂಬ ಮಾತಿಗೆ ಅನ್ವರ್ಥವಾಗಿ ಬದುಕುತ್ತಿರುವವರು ಅರಂತೋಡಿನ ಹೆಮ್ಮೆಯ ಪುತ್ರ, ಅನಿವಾಸಿ ಉದ್ಯಮಿ ಸೈಫುದ್ದೀನ್ ಪಟೇಲ್. ಒಂದು ಊರಿನ ನಿಜವಾದ ಅಭಿವೃದ್ಧಿ ಎಂದರೆ ಕೇವಲ ರಸ್ತೆ, ಕಟ್ಟಡಗಳ ನಿರ್ಮಾಣವಲ್ಲ; ಬದಲಾಗಿ ಆ ಮಣ್ಣಿನಲ್ಲಿ ಹುಟ್ಟಿ ಬೆಳೆದ ಯುವಜನತೆ ತಮ್ಮ ಊರಿನ ಕಷ್ಟ-ಸುಖಗಳಿಗೆ ಹೇಗೆ ಸ್ಪಂದಿಸುತ್ತಾರೆ ಎಂಬುದರ ಮೇಲೆ ನಿರ್ಧಾರವಾಗುತ್ತದೆ ಎಂಬುದನ್ನು ಅವರು ತಮ್ಮ ನಿಸ್ವಾರ್ಥ ಸೇವೆಯ ಮೂಲಕ ಸಾಬೀತುಪಡಿಸುತ್ತಿದ್ದಾರೆ.
ಉದ್ಯೋಗದ ನಿಮಿತ್ತ ಸಪ್ತಸಾಗರದಾಚೆ ನೆಲೆಸಿದ್ದರೂ, ಸೈಫುದ್ದೀನ್ ಅವರ ಮನಸ್ಸು ಸದಾ ತಮ್ಮ ಹುಟ್ಟೂರಿನ ಜನರ ಏಳಿಗೆಗಾಗಿ ಮಿಡಿಯುತ್ತಿದೆ. ಅರಂತೋಡು ಮತ್ತು ಸುಳ್ಯ ಭಾಗದ ಸಾಮಾಜಿಕ, ಶೈಕ್ಷಣಿಕ ಹಾಗೂ ಧಾರ್ಮಿಕ ಕಾರ್ಯಕ್ರಮಗಳಿಗೆ ಅವರು ನೀಡುತ್ತಿರುವ ಬೆಂಬಲ ಅಪಾರ.
’ಪಟೇಲ್ ಚಾರಿಟೇಬಲ್ ಟ್ರಸ್ಟ್’ ಮೂಲಕ ಬಡ ರೋಗಿಗಳಿಗೆ ವೈದ್ಯಕೀಯ ನೆರವು, ಪ್ರತಿಭಾವಂತ ವಿದ್ಯಾರ್ಥಿಗಳಿಗೆ ಶೈಕ್ಷಣಿಕ ಆಸರೆ ಮತ್ತು ಗ್ರಾಮೀಣ ಕ್ರೀಡಾಪಟುಗಳಿಗೆ ಪ್ರೋತ್ಸಾಹ ನೀಡುವ ಮೂಲಕ ಅವರು ಸಮಾಜಮುಖಿ ಕಾರ್ಯಗಳಲ್ಲಿ ತಮ್ಮನ್ನು ತೊಡಗಿಸಿಕೊಂಡಿದ್ದಾರೆ.
ನಮ್ಮೂರಿನ ಯುವಜನತೆ ಉನ್ನತ ಶಿಕ್ಷಣ ಪಡೆದು ದೊಡ್ಡ ಮಟ್ಟಕ್ಕೆ ಬೆಳೆಯುವುದರ ಜೊತೆಗೆ “ನನ್ನ ಊರು-ನನ್ನ ಜವಾಬ್ದಾರಿ” ಎಂಬ ಸಾಮಾಜಿಕ ಕಳಕಳಿಯನ್ನು ಬೆಳೆಸಿಕೊಳ್ಳುವುದು ಇಂದಿನ ಅಗತ್ಯವಾಗಿದೆ. ಸೈಫುದ್ದೀನ್ ಪಟೇಲ್ ಅವರಂತೆ ವಿದ್ಯಾವಂತ ಯುವಕರು ತಾವು ಎಲ್ಲೇ ಇದ್ದರೂ ಊರಿನ ಅಭಿವೃದ್ಧಿಗೆ ಕೈಜೋಡಿಸಿದರೆ ಸುಳ್ಯ ತಾಲೂಕಿನ ಸಮಗ್ರ ಅಭಿವೃದ್ಧಿ ಖಂಡಿತ ಸಾಧ್ಯ. ಅವರ ಈ ನಿಸ್ವಾರ್ಥ ಸೇವೆಗೆ ಇಡೀ ಸಮಾಜದ ಸಲಾಂ ಸಲ್ಲಲೇಬೇಕು.
