ಕೊಚ್ಚಿ: ಕೇರಳದ ಕೊಚ್ಚಿ ಬಳಿಯ ನೆಡುಂಬಸ್ಸೇರಿ ವಿಮಾನ ನಿಲ್ದಾಣ ರಸ್ತೆಯಲ್ಲಿ ಸಂಭವಿಸಿದ ಭೀಕರ ಮಿನಿ ಕೂಪರ್ ಕಾರು ಅಪಘಾತ ಪ್ರಕರಣದಲ್ಲಿ ಪೊಲೀಸರು ಮಹಜರು ಪ್ರಕ್ರಿಯೆ (ಕ್ರೈಂ ಸೀನ್ ರೀಕನ್‌ಸ್ಟ್ರಕ್ಷನ್) ಪೂರ್ಣಗೊಳಿಸಿದ್ದು, ತನಿಖೆ ವೇಳೆ ಆಘಾತಕಾರಿ ಸತ್ಯಗಳು ಹೊರಬಂದಿವೆ. ಅಪಘಾತದ ವೇಳೆ ಕಾರು ಬರೋಬ್ಬರಿ ಗಂಟೆಗೆ 120 ಕಿ.ಮೀಗೂ ಹೆಚ್ಚಿನ ವೇಗದಲ್ಲಿತ್ತು ಎಂಬ ಅಂಶವನ್ನು ಆರೋಪಿ ಚಾಲಕ ಪೊಲೀಸರ ಎದುರು ಒಪ್ಪಿಕೊಂಡಿದ್ದಾನೆ.
ಘಟನೆಯ ಹಿನ್ನೆಲೆ:
ಕೆಲಸ ಮುಗಿಸಿ ತಡರಾತ್ರಿ ಚಹಾ ಕುಡಿಯಲು ಸ್ಕೂಟರ್‌ನಲ್ಲಿ ತೆರಳುತ್ತಿದ್ದ ಕರ್ನಾಟಕ ಮೂಲದ ಇಯಾಸ್ (ದಕ್ಷಿಣ ಕನ್ನಡ), ವಯನಾಡಿನ ದೇವಿಕಾ ಹಾಗೂ ಪಾಲಕ್ಕಾಡ್‌ನ ಗೋಪಿಕಾ ಎಂಬ ಮೂವರು ಯುವಕ-ಯುವತಿಯರಿಗೆ ಅತಿವೇಗದಲ್ಲಿ ಬಂದ ಮಿನಿ ಕೂಪರ್ ಡಿಕ್ಕಿ ಹೊಡೆದಿತ್ತು. ಡಿಕ್ಕಿಯ ತೀವ್ರತೆಗೆ ಸ್ಕೂಟರ್ ನಜ್ಜುಗುಜ್ಜಾಗಿದ್ದು, ಮೂವರೂ ಸ್ಥಳದಲ್ಲೇ ದುರಂತ ಸಾವನ್ನಪ್ಪಿದ್ದರು.
ಸುಣ್ಣಮೂಲೆಯಲ್ಲಿ ಕಣ್ಣೀರಿನ ವಿದಾಯ:
ಮೃತ ಇಯಾಸ್ ಅವರ ಮೃತದೇಹವನ್ನು ಮರಣೋತ್ತರ ಪರೀಕ್ಷೆಯ ಬಳಿಕ ನಿನ್ನೆ ತಡರಾತ್ರಿ ಸುಮಾರು 12:30ಕ್ಕೆ ದಕ್ಷಿಣ ಕನ್ನಡ ಜಿಲ್ಲೆಯ ಸುಳ್ಯ ತಾಲೂಕಿನ ಸುಣ್ಣಮೂಲೆಯ ಸ್ವಗೃಹಕ್ಕೆ ತರಲಾಯಿತು. ಯುವಕನ ಅಕಾಲಿಕ ನಿಧನಕ್ಕೆ ಇಡೀ ಊರೇ ಕಂಬನಿ ಮಿಡಿದಿದೆ. ಇಂದು ನೂರಾರು ಸಾರ್ವಜನಿಕರು ಹಾಗೂ ಆಪ್ತರ ಸಮ್ಮುಖದಲ್ಲಿ ಜನಾಜಾ ನಮಾಜ್ (ಅಂತಿಮ ಪ್ರಾರ್ಥನೆ) ನೆರವೇರಿಸಿ, ಬಳಿಕ ಸ್ಥಳೀಯ ಜುಮಾ ಮಸೀದಿಯ ಖಬರಸ್ತಾನದಲ್ಲಿ ದಫನ್ ಕಾರ್ಯವನ್ನು ನೆರವೇರಿಸಲಾಯಿತು.
ಪೊಲೀಸ್ ಮಹಜರು ಮತ್ತು ಆರೋಪಿಯ ತಪ್ಪೊಪ್ಪಿಗೆ:
ಪೊಲೀಸರು ಆರೋಪಿ ಸುಹೈಲ್ ಸಜೀವ್‌ನನ್ನು (19) ಘಟನಾ ಸ್ಥಳಕ್ಕೆ ಕರೆದೊಯ್ದು ವಿವರವಾದ ಸ್ಥಳ ಮಹಜರು ನಡೆಸಿದ್ದಾರೆ. ಈ ವೇಳೆ ತನಿಖಾಧಿಕಾರಿಗಳ ಪ್ರಶ್ನೆಗೆ ಉತ್ತರಿಸಿದ ಸುಹೈಲ್, “ಅಪಘಾತ ಸಂಭವಿಸಿದ ಸಮಯದಲ್ಲಿ ತಾನು ಕಾರನ್ನು ಗಂಟೆಗೆ ಸುಮಾರು 120 ಕಿ.ಮೀ ವೇಗದಲ್ಲಿ ಚಲಾಯಿಸುತ್ತಿದ್ದೆ” ಎಂದು ಒಪ್ಪಿಕೊಂಡಿದ್ದಾನೆ. ಆ ವೇಗದಲ್ಲಿ ತಿರುವಿನಲ್ಲಿ ನಿಯಂತ್ರಣ ತಪ್ಪಿ ನೇರವಾಗಿ ಸ್ಕೂಟರ್‌ಗೆ ಡಿಕ್ಕಿ ಹೊಡೆದಿದ್ದಾಗಿ ತಿಳಿಸಿದ್ದಾನೆ.
“ನಮ್ಮಪ್ಪ ನೋಡಿಕೊಳ್ಳುತ್ತಾನೆ” ಎಂದು ಕೊಬ್ಬು ತೋರಿದ್ದ ಆರೋಪಿ:
ಅಪಘಾತದ ಬೆನ್ನಲ್ಲೇ ಸ್ಥಳೀಯರು ಆತನನ್ನು ಹಿಡಿದು ತರಾಟೆಗೆ ತೆಗೆದುಕೊಂಡಾಗ, ಕಿಂಚಿತ್ತೂ ಪಶ್ಚಾತ್ತಾಪವಿಲ್ಲದೆ “ರಸ್ತೆಗಳಿರುವುದೇ ವೇಗವಾಗಿ ಓಡಿಸಲು, ಏನೇ ಆದರೂ ನಮ್ಮಪ್ಪ ಎಲ್ಲವನ್ನೂ ಸರಿಮಾಡುತ್ತಾನೆ, ನೋಡಿಕೊಳ್ಳುತ್ತಾನೆ” ಎಂದು ದುರಹಂಕಾರದ ಮಾತುಗಳನ್ನಾಡಿದ್ದ. ಪ್ರಮುಖ ಜವಳಿ ವ್ಯಾಪಾರಿಯ ಪುತ್ರನಾದ ಈತ, ಘಟನೆಗೂ ಮುನ್ನ ಮದ್ಯ ಸೇವಿಸಿ ಅಮಲಿನಲ್ಲಿ ವಾಹನ ಚಲಾಯಿಸಿದ್ದು ವೈದ್ಯಕೀಯ ತಪಾಸಣೆಯಲ್ಲಿ ದೃಢಪಟ್ಟಿದೆ.
ಸದ್ಯ ಪೊಲೀಸರು ಮಹಜರು ವರದಿ ಹಾಗೂ ಸಿಸಿಟಿವಿ ದೃಶ್ಯಾವಳಿಗಳನ್ನು ಆಧರಿಸಿ ಆರೋಪಿಯ ವಿರುದ್ಧ ಬಿಎನ್‌ಎಸ್ ಅಡಿಯಲ್ಲಿ ಗಂಭೀರ ಮತ್ತು ಜಾಮೀನು ರಹಿತ ಸೆಕ್ಷನ್‌ಗಳನ್ನು ದಾಖಲಿಸಿ ಕಠಿಣ ಕಾನೂನು ಕ್ರಮ ಕೈಗೊಂಡಿದ್ದಾರೆ.
