ಸ್ಪೇನ್: ಯುಇಎಫ್ಎ ಚಾಂಪಿಯನ್ಸ್ ಲೀಗ್ (UEFA Champions League) ಕ್ವಾರ್ಟರ್-ಫೈನಲ್ನ ಅತ್ಯಂತ ರೋಚಕ ಎರಡನೇ ಲೆಗ್ ಪಂದ್ಯದಲ್ಲಿ ಅಟ್ಲೆಟಿಕೊ ಮ್ಯಾಡ್ರಿಡ್ (Atletico Madrid) ವಿರುದ್ಧ ಬಾರ್ಸಿಲೋನಾ (Barcelona) 2-1 ಗೋಲುಗಳ ಅಂತರದಿಂದ ಗೆಲುವು ಸಾಧಿಸಿದೆ. ಆದರೆ, ಎರಡು ಲೆಗ್ಗಳ ಒಟ್ಟಾರೆ (Aggregate) 3-2 ಗೋಲುಗಳ ಆಧಾರದ ಮೇಲೆ ಅಟ್ಲೆಟಿಕೊ ಮ್ಯಾಡ್ರಿಡ್ 9 ವರ್ಷಗಳ ಬಳಿಕ ಸೆಮಿಫೈನಲ್ ಪ್ರವೇಶಿಸುವಲ್ಲಿ ಯಶಸ್ವಿಯಾಗಿದೆ.
ರಿಯಾದ್ ಏರ್ ಮೆಟ್ರೋಪೊಲಿಟಾನೊ ಕ್ರೀಡಾಂಗಣದಲ್ಲಿ ಮಂಗಳವಾರ ನಡೆದ ಈ ಪಂದ್ಯದಲ್ಲಿ ಬಾರ್ಸಿಲೋನಾ ಆರಂಭದಿಂದಲೇ ಭರ್ಜರಿ ಆಟ ಪ್ರದರ್ಶಿಸಿತು. ಪಂದ್ಯ ಆರಂಭವಾದ ಕೇವಲ 4ನೇ ನಿಮಿಷದಲ್ಲೇ ಯುವ ಆಟಗಾರ ಲಮಿನ್ ಯಮಾಲ್ (Lamine Yamal) ಬಾರ್ಸಿಲೋನಾಗೆ ಮೊದಲ ಗೋಲು ತಂದುಕೊಟ್ಟರು. ಇದಾದ ಕೆಲವೇ ಹೊತ್ತಿನಲ್ಲಿ, ಅಂದರೆ 24ನೇ ನಿಮಿಷದಲ್ಲಿ ಫೆರಾನ್ ಟೊರೆಸ್ (Ferran Torres) ಅತ್ಯದ್ಭುತವಾದ ಮತ್ತೊಂದು ಗೋಲು ಗಳಿಸಿ ಬಾರ್ಸಿಲೋನಾದ ಮುನ್ನಡೆಯನ್ನು 2-0ಗೆ ಏರಿಸಿದರು.
ಆದರೆ, 31ನೇ ನಿಮಿಷದಲ್ಲಿ ಅಟ್ಲೆಟಿಕೊ ಮ್ಯಾಡ್ರಿಡ್ನ ಅಡೆಮೊಲಾ ಲುಕ್ಮನ್ (Ademola Lookman) ಒಂದು ನಿರ್ಣಾಯಕ ಗೋಲು ಬಾರಿಸುವ ಮೂಲಕ ಬಾರ್ಸಿಲೋನಾಗೆ ತಿರುಗೇಟು ನೀಡಿದರು. ದ್ವಿತೀಯಾರ್ಧದಲ್ಲಿ ಬಾರ್ಸಿಲೋನಾ ಇನ್ನಷ್ಟು ಗೋಲು ಗಳಿಸಲು ಪ್ರಯತ್ನಿಸಿತಾದರೂ, ಅಟ್ಲೆಟಿಕೊದ ರಕ್ಷಣಾ ವಿಭಾಗ ಅದನ್ನು ಸಮರ್ಥವಾಗಿ ತಡೆಯಿತು. ಪಂದ್ಯದ ಕೊನೆಯಲ್ಲಿ ಬಾರ್ಸಿಲೋನಾದ ಡಿಫೆಂಡರ್ ಎರಿಕ್ ಗಾರ್ಸಿಯಾ (Eric Garcia) ಅವರಿಗೆ ರೆಡ್ ಕಾರ್ಡ್ (Red Card) ನೀಡಿದ್ದರಿಂದ ತಂಡವು 10 ಆಟಗಾರರಿಗೆ ಸೀಮಿತವಾಗಿ ಸಂಕಷ್ಟಕ್ಕೆ ಸಿಲುಕಿತು.
ಬಾರ್ಸಿಲೋನಾದ ತವರು ಕ್ರೀಡಾಂಗಣ ಕ್ಯಾಂಪ್ ನೌನಲ್ಲಿ ನಡೆದಿದ್ದ ಮೊದಲ ಲೆಗ್ನಲ್ಲಿ ಅಟ್ಲೆಟಿಕೊ ಮ್ಯಾಡ್ರಿಡ್ 2-0 ಅಂತರದಿಂದ ಗೆಲುವು ಸಾಧಿಸಿತ್ತು. ಹೀಗಾಗಿ ಈ ಎರಡನೇ ಲೆಗ್ನಲ್ಲಿ 1-2 ಅಂತರದಿಂದ ಸೋತರೂ, ಒಟ್ಟಾರೆ 3-2 ಮುನ್ನಡೆಯೊಂದಿಗೆ ಸೆಮಿಫೈನಲ್ಗೆ ಲಗ್ಗೆಯಿಟ್ಟಿದೆ. ಸೆಮಿಫೈನಲ್ನಲ್ಲಿ ಅಟ್ಲೆಟಿಕೊ ತಂಡವು ಆರ್ಸೆನಲ್ ಅಥವಾ ಸ್ಪೋರ್ಟಿಂಗ್ ತಂಡವನ್ನು ಎದುರಿಸಲಿದೆ.
