ಯುಇಎಫ್ಎ ಚಾಂಪಿಯನ್ಸ್ ಲೀಗ್ನ (UEFA Champions League) ಕ್ವಾರ್ಟರ್ ಫೈನಲ್ನ ಎರಡನೇ ಸುತ್ತಿನ ಪಂದ್ಯದಲ್ಲಿ ಲಿವರ್ಪೂಲ್ ವಿರುದ್ಧ ಪ್ಯಾರಿಸ್ ಸೇಂಟ್-ಜರ್ಮೈನ್ (PSG) 2-0 ಅಂತರದ ಭರ್ಜರಿ ಗೆಲುವು ಸಾಧಿಸಿದೆ. ಈ ಮೂಲಕ ಎರಡೂ ಲೆಗ್ಗಳ ಆಧಾರದ ಮೇಲೆ ಒಟ್ಟಾರೆ 4-0 ಅಂತರದಿಂದ ಗೆದ್ದು, ಹಾಲಿ ಚಾಂಪಿಯನ್ ಪಿಎಸ್ಜಿ ಸೆಮಿಫೈನಲ್ಗೆ ಲಗ್ಗೆಯಿಟ್ಟಿದೆ.
ಇಂಗ್ಲೆಂಡ್ನ ಪ್ರತಿಷ್ಠಿತ ಆನ್ಫೀಲ್ಡ್ (Anfield) ಕ್ರೀಡಾಂಗಣದಲ್ಲಿ ನಡೆದ ಈ ನಿರ್ಣಾಯಕ ಪಂದ್ಯದಲ್ಲಿ, ತವರಿನ ಅಭಿಮಾನಿಗಳೆದುರು ಲಿವರ್ಪೂಲ್ ತಂಡ ಕಮ್ಬ್ಯಾಕ್ ಮಾಡುವ ನಿರೀಕ್ಷೆಯಿತ್ತು. ಆದರೆ, ಪಿಎಸ್ಜಿ ಸ್ಟಾರ್ ಆಟಗಾರ ಓಸ್ಮಾನ್ ಡೆಂಬೆಲೆ (Ousmane Dembele) ಅವರು 72ನೇ ನಿಮಿಷದಲ್ಲಿ ಮತ್ತು ಪಂದ್ಯದ ಹೆಚ್ಚುವರಿ ಸಮಯದಲ್ಲಿ (stoppage time) ಎರಡು ಅತ್ಯಾಕರ್ಷಕ ಗೋಲುಗಳನ್ನು ಸಿಡಿಸುವ ಮೂಲಕ ಲಿವರ್ಪೂಲ್ನ ಆಸೆಗೆ ತಣ್ಣೀರು ಎರಚಿದರು.
ಪ್ಯಾರಿಸ್ನಲ್ಲಿ ನಡೆದಿದ್ದ ಮೊದಲ ಲೆಗ್ನಲ್ಲಿ 2-0 ಅಂತರದ ಹಿನ್ನಡೆಯಲ್ಲಿದ್ದ ಆರ್ನೆ ಸ್ಲಾಟ್ (Arne Slot) ನೇತೃತ್ವದ ಲಿವರ್ಪೂಲ್, ಈ ಪಂದ್ಯದಲ್ಲಿ ಉತ್ತಮ ಹೋರಾಟ ನೀಡಿತಾದರೂ, ಗೋಲು ಗಳಿಸುವ ಹಲವು ಅವಕಾಶಗಳನ್ನು ಕೈಚೆಲ್ಲಿತು. ಜಾರ್ಜಿ ಮಮರ್ದಶ್ವಿಲಿ (Giorgi Mamardashvili) ಅವರ ಕೆಲವು ಅತ್ಯುತ್ತಮ ಸೇವ್ಗಳ ಹೊರತಾಗಿಯೂ, ಪಿಎಸ್ಜಿಯ ಬಲಿಷ್ಠ ದಾಳಿ ಹಾಗೂ ರಕ್ಷಣಾ ಪಡೆಯನ್ನು ಭೇದಿಸಲು ಲಿವರ್ಪೂಲ್ ವಿಫಲವಾಯಿತು. ಈ ಸೋಲಿನೊಂದಿಗೆ ಲಿವರ್ಪೂಲ್ನ ಈ ವರ್ಷದ ಚಾಂಪಿಯನ್ಸ್ ಲೀಗ್ ಪಯಣ ಅಂತ್ಯಗೊಂಡಿದೆ.
