ಪೇರಡ್ಕ: ಪೇರಡ್ಕ ಮದ್ರಸಾ ಕಛೇರಿಯಲ್ಲಿ ಅಲ್ ಬಿರ್ರ್ ಇಸ್ಲಾಮಿಕ್ ಪ್ರಿ ಸ್ಕೂಲ್ನ 2026-27ನೇ ನೂತನ ಶೈಕ್ಷಣಿಕ ವರ್ಷದ ದಾಖಲಾತಿ ಪ್ರಕ್ರಿಯೆಗೆ ಚಾಲನೆ ನೀಡಲಾಯಿತು. ಪೇರಡ್ಕ ಮುಹಿಯುದ್ದೀನ್ ಜುಮಾ ಮಸೀದಿ ಅಧ್ಯಕ್ಷರೂ ಹಾಗೂ ರಾಜ್ಯ ಕಾರ್ಮಿಕ ಕನಿಷ್ಠ ವೇತನ ಸಲಹಾ ಮಂಡಳಿಯ ಅಧ್ಯಕ್ಷರೂ ಆಗಿರುವ ಟಿ.ಎಂ ಶಹೀದ್ ತೆಕ್ಕಿಲ್ ಅವರು ನೂತನ ದಾಖಲಾತಿಗೆ ಚಾಲನೆ ನೀಡಿದರು.
ಆಧುನಿಕ ಬೋಧನೆ ಮತ್ತು ಕಲಿಕೆಯ ವ್ಯವಸ್ಥೆಗಳೊಂದಿಗೆ ಧಾರ್ಮಿಕ ಕಲಿಕೆಯನ್ನು ಸಮನ್ವಯಗೊಳಿಸುವ ಉದ್ದೇಶದಿಂದ ಅಲ್ ಬಿರ್ರ್ ಶಿಕ್ಷಣ ಸಂಸ್ಥೆಯನ್ನು ಸ್ಥಾಪಿಸಲಾಗಿದೆ. ಇದು ಮಗುವಿನ ಆಲೋಚನೆಗಳು ಮತ್ತು ಭಾವನೆಗಳನ್ನು ಇಸ್ಲಾಮಿಕ್ ಸಂಸ್ಕೃತಿಯಡಿಯಲ್ಲಿ ರೂಪಿಸುವ ಗುರಿಯನ್ನು ಹೊಂದಿದೆ. ಆಧುನಿಕ ತಂತ್ರಜ್ಞಾನಗಳ ಸಹಾಯ ಮತ್ತು ಮನಃಶಾಸ್ತ್ರೀಯ ವಿಧಾನಗಳನ್ನು ಬಳಸಿಕೊಂಡು ಕಲಿಕೆಯ ಪ್ರಕ್ರಿಯೆಯನ್ನು ಇಲ್ಲಿ ಆಹ್ಲಾದಕರವಾಗಿಸಲಾಗುತ್ತದೆ.
ಈ ಸಂದರ್ಭದಲ್ಲಿ ಜಮಾಅತ್ ಖತೀಬ್ ಅಹ್ಮದ್ ನಈಂ ಮಅಬರಿ ಫೈಝಿ ಪ್ರಾರ್ಥನೆಗೆ ನೇತೃತ್ವ ನೀಡಿದರು. ಮದ್ರಸಾ ಅಧ್ಯಾಪಕರಾದ ಅಹ್ಮದ್ ಶಾಕಿರ್ ಮುಸ್ಲಿಯಾರ್ ಮತ್ತು ಹಾರಿಸ್ ಅಝ್ಹರಿ ಉಪಸ್ಥಿತರಿದ್ದರು. ಜಮಾಅತ್ ಉಪಾಧ್ಯಕ್ಷ ಹನೀಫ್ ಟಿ.ಬಿ, ಕಾರ್ಯದರ್ಶಿ ಕೆ.ಎಂ ಉಸ್ಮಾನ್, ಸಿನಾನ್ ಗೂನಡ್ಕ ಹಾಗೂ ಅನೇಕ ಪೋಷಕರು ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು. ಅಲ್ ಬಿರ್ರ್ ಅಧ್ಯಾಪಕಿ ಸಾಬಿರಾ ಗೂನಡ್ಕ ಅವರು ದಾಖಲಾತಿ ಪ್ರಕ್ರಿಯೆಗಳನ್ನು ನಡೆಸಿಕೊಟ್ಟರು.
ಸಂಸ್ಥೆಯ ಪ್ರಮುಖ ವಿಶೇಷತೆಗಳು:
ವಯೋಮಿತಿ: ಮೂರೂವರೆ ವರ್ಷ ಪೂರೈಸಿದ ಮಕ್ಕಳಿಗೆ ಪ್ರವೇಶಾತಿ ನೀಡಲಾಗುತ್ತದೆ.
ದಾಖಲಾತಿ ಅವಧಿ: ಫೆಬ್ರವರಿ 1 ರಿಂದ ಮೇ 31 ರವರೆಗೆ ಪ್ರವೇಶಾತಿ ಪ್ರಕ್ರಿಯೆ ನಡೆಯಲಿದೆ.
ಸೀಮಿತ ಸೀಟುಗಳು: ವೈಯಕ್ತಿಕ ಗಮನ ನೀಡುವ ನಿಟ್ಟಿನಲ್ಲಿ ಸೀಮಿತ ವಿದ್ಯಾರ್ಥಿಗಳಿಗೆ ದಾಖಲಾತಿ ನೀಡಲಾಗುತ್ತದೆ.
ಕಲಿಕಾ ಕ್ರಮ: ಮೊದಲ ವರ್ಷದಲ್ಲೇ ಇಂಗ್ಲಿಷ್, ಗಣಿತ, ವಿಜ್ಞಾನ ಮತ್ತು ಮಾತೃಭಾಷೆಯೊಂದಿಗೆ ಅರೇಬಿಕ್ ವರ್ಣಮಾಲೆ ಹಾಗೂ ದೈನಂದಿನ ದಿಕ್ರ್ಗಳನ್ನು ಕಲಿಸಲಾಗುತ್ತದೆ.
ತಾಂತ್ರಿಕ ಸೌಲಭ್ಯ: ಸಿ.ಸಿ.ಟಿವಿ ಪ್ರಯೋಜನದೊಂದಿಗೆ ಮಕ್ಕಳ ದೈನಂದಿನ ತರಗತಿಯ ಕಾರ್ಯಕ್ಷಮತೆಯನ್ನು ವೆಬ್ಸೈಟ್ ಮೂಲಕ ಮೇಲ್ವಿಚಾರಣೆ ಮಾಡುವ ಸೌಲಭ್ಯವಿದೆ.
ಸಾರ್ವಕಾಲಿಕ ಇಸ್ಲಾಮಿಕ್ ತತ್ವಾದರ್ಶಗಳನ್ನು ಆಧುನಿಕ ಜಗತ್ತಿಗೆ ಪೂರಕವಾಗಿ ಮಕ್ಕಳಿಗೆ ತಲುಪಿಸುವ ಈ ಶೈಕ್ಷಣಿಕ ಯೋಜನೆಯು ಸಮುದಾಯದ ಗಮನ ಸೆಳೆಯುತ್ತಿದೆ.
